ياحلم في المقبره
إفرد إيديك حتنول
بلدنا متضفره
داخله في بطن الغول
شبعنا م المسخره
والنعمه بكره تزول
..........
ياحلم في المدرسه
ماتعلم التلاميذ
أللمه تعمل وتد
تغلب جيوش جنكيز
والفرقه تقتل أسد
تركب كلاب ومعيز
..........
ياحلم في المبتدا
مطرح ماتجري نروح
ينزل علينا الندا
نضحك حلاوة روح
طبطب علي كتفنا
ننسا القفا المدبوح
..........
يامخوفين البنات
وهما جوا الدار
من إمتي لنتخابات
تحكمها جنه ونار؟؟
يامولعين الفانوس
يامطببين الميزان
وحياة مقام النبي
عنيكوا ع الدكان
نزل رفوف الأمل
إنتوا الهلال والجمل
إنتوا الحديد والزان
أيوب دا لما صبر
مبقاش يهمه فروق
ونعسه لما كبر
نزلت عليه السوق
باعت شعور القمر
عشان ريال مخروء
..........
ياحلم في المندره
لولاك علينا نموت
حيرجعونا ورا
بالسيف وبالنبوت
ويشغلوا المعصره
ويركبوا الكبوت
خايفين علي مصرنا ؟؟
قال يعني بنت بنوت
ديب البراري رجع
كسر علينا الدار
وقالي روح إنتخب
إما تروح النار
ميزان في قلبه فانوس؟؟
النور ياناس بفلوس
حتي أسألوا السمسار
حلم الكبير ياكبير
نحلم وإحنا جلوس
وان نمت فوق السرير
الحلم يبقا كابوس
..........
ياحلم قلة أدب
قل لم أدبكوا كمان
البغل لما ركب
يقعد سنين همدان
لا تشوف له خلفه دكر
كل اللي جاي نسوان
..........
الحلم في السلم
زي الرز في الكوسه
لو نمت جوه الفيلم
راحت عليك بوسه
دست الزرار نورت
واللعبه مدروسه
خمس سنين ياوطن
نتعاص كمان عوصه
..........
ياحلم لولا كده ؟؟
طب مش كده راضيين
فتوحه بالمقدره
طول عمركم شاطرين
ياحلم صحصح لنا
الشعب لسه جعان
ولا انت جاي عندنا
تشطب الدكان
ياحلم في المبتدا
خد من كلامي ورد
ولما تيجي العدا
تلقي طحالي يصد
إمنع كلام الدجل
أصل الكلام بيخض
..........
ياحلم زي فلوس
جايه لنا في المينا
حلمت بيها في يوم
معمره سينا
أتاري حلم الشيخ
يصرفها في الزينه
يفط نيون نورت
شعارات كتير سيطرت
علي كل تراسينا
يارب نطلب دعا
يهديه ويهدينا
..........
ياحلم في المنتزه
جثه ورا جثه
مفيش ولا موعظه
من تلتميت حصه ؟؟
ملعون ابو المدرسه
ملعون ابو الناظر
إزاي حتحكم بلد
وبتاخد البزه ؟؟
عدت سنه من سنه
ولا التقينا رجال
لميت جوافه وبلح
وحدفت في الغربال
نزل البذور والنقا
أكلته للوزه
..........
ياحلم يا عبقري
ليه الحمار بيجر
لما الميدان يتخنق
والدم فيه بيشر
صدر الصبايا انفتح
عدي الرصاص المر
وانت في قلب القفص
تمسح دموع الشر
ملعون ابو الافترا
خد من قلوبنا وصر
..........
ياحلم في المنتزه
كسر الرخام بيفوت
في الضهر ومركزه
تشبه سنان الحوت
كل اللي ماتوا هنا
الوش كان مبسوط
مظهرش فيه الالم
وانت اللي خايف موت
..........
ياحلم شفت القمر
سايل علي الحيطه
والشقيانين فرفشوا
ام رقعوا زغريطه
قالوا دا حزب الامل
حتي اسألوا تيتا
وكل شئ مكسور
حنرده في الزيطه
ونركب الحنطور
ويسوق ابو شريطه
نقسمها خلف خلاف
الراس مع الاكتاف
واللعبه مشروطه
البطن والمصران
نديها للأخوان
والرجل ويا الباط
نحدفها للاقباط
والكليه نسرقها
والاليا فرقها
وتبقي قسمة حلال
الكل اهو ... داقها
المزاج
